Parti I
Fala di HipHop tarrafalense ka ê nada difícil y ka tem txeu diferensa ku realidadi di otuz concelhuz di Santiagu y otuz Ilhaz.
Karacterizadu pa poku diferensa entri si protagonistaz, ê difícil fala di un Rapper ô otu ki ta distaka na Kabu Verdi sima tambe na Tarrafal, y falandu di distaki n ka sta fala di parci mas txeu pamodi kela ta dipendi txeu di oportunidadi, n sta fala sim di kualidadi.
Fala di rapperz distakaduz n ka sta fala di rapper ki tem um álbum profissional ô ki dja kanta num palku almejadu pa maioria di rappers, mas sim di um rapper ki ta txoma atenson pa u ke tem na si rap, si racionalidadi y skills. Tem álbum na mercadu ka ê sinal di alta kualidadi ka siginifika ma kel rapper dja passa otuz ku si rap mas, podi kontici, tudu ao mesmu tempo, ki e tem kualidadi, tem reconhecimentu, tem álbum profissional na mercadu, kel n ta flal sempri y ku cinseridadi y tambe komu incentivu a kez ki inda ka koncigui poi un trabadju na mercadu, ki kela ka ta dependi sô di talentu, mas tambe di sorti, padrinhagem, spidienti, isforçu etc
Tarrafal tem txeuz “kantadoriz di rap” y pokuz tem kel qualidadi ki rap komu ritimu y poesia debi tem, mesmu pa kez ki ta kuspi punchline y pa kez ki ta kuspi knowledge.
Na mesmu sentidu n ta nota certu preguisa na seguidoriz di rap na criason di stilu próprio ô fazi kel ki rap ta mesti ki ê dinamismu sem mata rap.
N ta fala di poku kriatividadi y puku diferensa entri rappers pa justifika n ta partilha un observason kin fazi ku nha rigurozidadi na obi rap.
**** 1º n nota ma txeu di kez rappers ki kanta dipoz di veteranu ( ki ka siguinifika midjor) di rap tarrafalense GN, kumesa ta imita flows cararacteristikuz di Gn. El kin ta konsidera un ícone di rap tarrafalense já ki nu ka podi fala di percursu di rap na Tarrafal sem fala di el, ê ta permitim fazi un pequenu observason na si rap (!!! Ka sta ku mesmu aceitason ki antiz, ki ta mostra ma el ê ka sta ku mesmu qualidadi!!!).
Enfim, GN di antiz ka ê mesmu di goci y mas, un rapper sima el nunka ka ta perdi si valor y talentu basta “improve”, dja n ka sta nota kel imitason na sons di GN.
Rappers ki ta imitadu ô maz korrectu si kalhar, rappers ki ta influência otuz rappers, ê kez ki tem stilo própriu y ki tem kualidadi.
**** 2º n nota ku tempu ma kumesa tambe ta imitadu un otu rapper di mangui, ki GN tambe influencial na nha manera di odja, ki ê Marito, un rapper ki bem kria si stilo própriu y tambe dje tem konquistadu alguns fãs y na nha ver e mesti usa midjor tudu ke tem pa rap ou pa músika no geral, u ki e ka sta usa di certeza, sinon n ta obiba si rap di otu manera. Ê têm voz, skills mas mesti disenvolvi mas y sincroniza tudu, y n ta acredita me tem tudu pa ser un rapper di top na Kabu Verdi ku mas evoluson.
Kel doz parte li era pa justifika poku kriatividadi entri rappers…continuando…
N ka podi dexa di fala di um rapper di qualidadi di stilo particular, ki n ka nota imitason y n ta atxa ma ka kontici devidu a si level, poku rapper ta fazi u ki e ta fazi por isso n ta atxa ma e ka imitadu devidu a “complexidadi”, e tem un stilo ki ta lembram Nas, n sta fala di James un di kez integrantiz di undergrounds Classic Boyz.
N ta aproveita pa fala di Classic Boyz ki tem tudu pa sta na Top5 di kez midjor Grupu di rap na Kabu Verdi apesar di filosofia underground djez mostra kualidadi.
Underground Underground, parcem ma rappers sta gosta di kel palavra li, y si kalhar 99% di rapper ki ta autodenomina undergrounds ka ta komporta komu underground rapper, já ki underground ka tem kel sedi di fama y dinheru kin sta odja rappers kol, ker dizer, pseudo-undergrounds.
Generalizandu inda kuzas mesti muda, HipHop têm si valor na mundu di múska y si alguém kre fazel pê tem kel aceitação ê tem ki tem seriedadi y racionalidadi nu ke ta fazi, n ta fla kela pamodi munti alguém sta ta fazel sem tem real ideia di u ki ê sta nel.
Ami hora kin sta fala di HipHop n ta odjal na tudu dimenson, nta valoriza tudu si elementuz: rap, graffiti, breack, kel consciência mc y otuz pormenoriz ki ta identifika HipHop, y por isso ka sta fazil fazi elogiuz pa rappers.
Tarrafal tem txeuz rappers ki tem algu y ki mesti disolvi ku possibilidadi di ser grandis rapper na esfera kabuverdiana y pan ka korri risku di fala di un y dexa otu pa traz y dexa ideia ki uns ta mas ki otu n ka limia nomi di nenhum. Ka tem nada ver ku kez kin cita na linhaz anterioriz ki ê apenaz indikasons pa justifika nhaz observasons.
Kabu Verdi inda ka sta avançadu na HipHop sima maioria di países lusófonos sta, y mesmu falandu di países di língua kriola n ta considera ma Kabu Verdi inda mesti aproxima mas ke kasu di Guiné Bissau, undi HipHop dja sta mas aceite na tudu faixa etária y sta evidenti basta odja na sucesso ou popularidadi di rapper sima polémiku Masta Tito (falandu di G Bissau).
Y si Kabu Verdi ka sta avançadu na HipHop e pa konsidera tambê Tarrafal mas, na nha manera di odja kultura HipHop sta ta ganha terrenu na Kabu Verdi y proporcionalmenti na Tarrafal.
By. Tivvy Loff
Comentários
Postar um comentário