Nyunne N'tafty Mixtape
So progresu di pensamentu sientífiku y dizenvolvimentu di arti ki ta mostranu ma paralém di germina, ma simenti di stória dja floresi. Kultura podi ser um alavanka pa nos ikunomia. Mas pa keli e nesesáriu rompi barera entri trabadju fíziku y intelektual, nu entantu mudansa é obra di homis di trabadju físiku.
E mesmu um stupidez, fla ma arti debi ser indiferenti peranti nos kontextu aktual. Arti ta rifleti vida di homis ki ta vivi y ta fazi akontesimentus. Pur isu um arti debi ser asesível a povu trabadjador y nau só pa um grupinhu di parazitas. Arti ta rifleti rialidadi di um tempu y tudu kontradisons. Pur isu ka izisti arti sem konteúdu y tendénsia.
Artista podi ser difinidu komu ingenheru di alma humana, pamodi ku arti e podi iduka povu y abri kaminhu pa juventudi ku armas ideológiku. Nton nu mesti ridifini nos kampu artistiku, ku um novu konsénsia, inkompatível ku pesimismu, ki a ta abatenu nós ladu spiritual.
Arti ki nu a ta mesti, tem ki sta karegadu di konfiansa na futuru, undi ki non só kontemporánius podi partisipa, mas també omis y mudjeris di próximu gerason. Nu sta na luta pa um liberdadi total sem ninhum kondison, nton kel ki a ta produzi debi sirbi komu alisersi di um kultura ki ka ta bem ser um kultura di klasi, mas verdaderamenti humana.
Um forti abrasu pa tudu artistas y atoris sosial progresistas, liberdadi nunka foi utopia, nos stória dja da prova. Di nha parti nta dexa um pedra na alisersi di kel grandi kultura humanu: ARTIZANAL